Бүгүн, балаҕан ыйын 27 күнүгэр, телебашня өрөспүүбүлүкэ былааҕын өҥнөрүнэн умайыаҕа. Бу туһунан РТРС пресс-сулууспата иһитиннэрэр.
Араас өҥнөөх уотунан сырдатан киэргэтии Судаарыстыбаннас күнүнэн холбонуоҕа.
Бу күн, 1990 сыллаахха, Сэбиэскэй автономия быраабын хааччахтыыр усулуобуйатыгар Саха сирин судаарыстыбаннай суверенитетын туһунан Декларацияны ылыммыттара, кини Россия федеративнай тэриллиитигэр бэриниилээҕин бигэргэппитэ уонна Саха сирин сомоҕолуур саҥа түһүмэҕин ыйбыта, өрөспүүбүлүкэ сайдыытын саҥа түһүмэҕэ саҕаламмыта.
Телебашня киэһээ 20:00-тан 24:00 чааска диэри сандаарыаҕа.