Москватааҕы судаарыстыбаннай университет нуучча тылын уонна култууратын институтун бэрэстэбиитэллэрэ, өрөспүүбүлүкэ туһунан сэдэх, ураты матырыйааллары хомуйаары уонна салгыы «Россия многоликая» бырайыакка көрдөрөөрү, Хотугулуу Илиҥҥи федеральнай университекка ыалдьыттаатылар. Бу туһунан үрдүк үөрэх кыһатын пресс-сулууспата иһитиннэрэр.
««Россия многоликая» — аан дойдутааҕы сырдатар онлайн-бырайыак. Бу Россия литературатын, култууратын, этнографиятын көрдөрүү. Бырайыак кыттыылаахтара — араас дойду бэрэстэбиитэллэрэ. Биһиги араас регионнары, олохтоох култуураны, этнографияны сырдатыахпытын баҕарабыт», — диэтэ Москватааҕы судаарыстыбаннай университет нуучча тылын уонна култууратын дириэктэрин солбуйааччы Валерий Частных.
Саха сиригэр ураты култууралаах, үгэстээх, тыллаах аҕыйах ахсааннаах норуоттар олороллорун бэлиэтээтэ, бу барыта бырагыраамаҕа көстүөхтээх.
Делегация Мамонт түмэлигэр, филолгическай факультекка, ХИФУ иһинэн үлэлиир Олоҥхо интститутугар, Эргэ куоракка, Тымныы саарыстыбатыгар сырытта. Маны таһынан, делегация нэдиэлэ устата Аммаҕа, Нерюнгригэ ыалдьыттыаҕа.
Филологическай факультет декана Галина Жондорова бырайыагы өйүүрүн биллэрдэ.
«Саха сирэ икки судаарыстыбаннай, биэс официальнай тыллаах. Маны таһынан, Саха сирин былыргы нуучча тылын бэрэстэбиитэллэрэ олороллор. Биһиги төрүт олохтоох нууччалар тылларын ураты, ол иһигэр Нуучча Уустуйатын матырыйаалларын биэрэргэ бэлэммит», — диэтэ кини.
Хомуллубут матырыйаалы регионнар бэрэстэбиитэллэрин кытта онлайн-көрсүһүүгэ көрдөрүөхтэрэ. Тэрийээччилэр көрсүһүүнү 2021 сыл балаҕан ыйын иккис аҥаарыгар былаанныыллар.