Бүгүн, бэс ыйын 6 күнүгэр, дойдуга нуучча тылын күнэ бэлиэтэнэр. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Бырааһынньыгынан Ил Дархан Айсен Николаев эҕэрдэлээтэ.
«Бу күн Россия өйдөбүнньүк бэлиэ күннэрин халандаарыгар ураты миэстэни ылар. Кини Александр Сергеевич Пушкин аатын кытта быстыспат ситимнээх. Нуучча тылын күнэ улуу нуучча поэта төрөөбүт күнүгэр бэлиэтэнэрэ кэрэхсэбиллээх», — диэтэ.
Саха сирин баһылыга нуучча тыла мөлүйүөнүнэн киһи биир сомоҕо буоларыгар тирэх, дойду духуобунай уонна историческай нэһилиэстибэтин быстыспат сорҕото буоларын бэлиэтээтэ.
«Бүгүн нуучча тыла дьону түмэр сүдү күүстээх. Россия хас биирдии олохтооҕо омугуттан уонна итэҕэлиттэн тутулуга суох нуучча тылынан саҥарар», — диэн чопчулаан бэлиэтээтэ.
Бэс ыйын 6 күнүн 2010 сыллаахха Холбоһуктаах нациялар тэрилтэлэрэ, нуучча тылын аан дойдутааҕы күнүнэн биллэрбитэ.
2011 сылтан бу бэлиэ күн Россия судаарыстыбаннай бырааһынньыгын быһыытынан бэлиэтэнэр.