Ахсынньы 24 күнүгэр, бүгүн, Ил Дархан Айсен Николаев Ил Түмэҥҥэ туһаайыытыгар, саха омук духуобунай ис баайын тутан хааларга уонна ону тарҕатарга Сахабыт сирин олохтоохторуттан уонна уопсастыбаттан киирбит этиини өйүүр, Норуот култуурунай-духуобунай киинин тутар уонна онно аналлаах сири аныыр туһунан иһитиннэрдэ.
Бу туһунан норуот маастара, СӨ култууратын үтүөлээх үлэһитэ, Таатта улууһун бочуоттаах олохтооҕо, бырайыак ааптара Борис Неустроев-Мандар Уус санаатын үллэһиннэ.
«Сахабыт сирин лидерэ, киэн туттар бас-көс киhибит Айсен Сергеевич Николаев норуотун тылын ылынан, саха култууратын, духуобунаhын өрө тутара, ытыктыыра – бу сахабыт норуотун үйэлээх үгэhэ, олоҕун-дьаhаҕын укулаата, философията аныгы балысхан кэмҥэ сүтэн-симэлийэн хаалбатын мэктиэтэ буолар. Yрдүк сололоох салайааччы төрүт норуотун итэҕэлин, култууратын, аан дойдуну анаарыытын, тылын-өhүн иӊэринэ сылдьара, итиэннэ ону харыстааhыҥҥа, кэлэр көлүөнэҕэ тиэрдиигэ болҕомтотун уурара, тус бэйэм санаабар, олус көдьүүстээх. Ил Дархан тустаах киини тутуутун туhунан быhаарыыта сахалыы санаабыт, сахалыы толкуйбут, олоххо сыhыаммыт тыыннааҕын уонна кэскиллээҕин туоhулуур», — диэтэ Мандар Уус.
Санатан эттэххэ, Таатта улууһун Томтор сэлиэнньэтигэр норуот култууратын комплексын тутуута 2022 сылга түмүктэнэрэ былааннанар.