Саха норуодунай суруйааччыта Баһылай Харысхал сэрии, таптал, киһи дьылҕатын туһунан элбэҕи суруйан хаалларбыта. Кини «Аммаҕа саас этэ», «Сэрии тыйыс тыына», «Бастыҥ хатыыта», «Көмүөл», «Эргиллиэм хайаан да» уонна да атын киһи сүрэҕин кылын таарыйар айымньылара испиктээк буолан туруоруллан, тыйаатыры таптааччылар улахан биһирэбиллэрин ылбыттара.
Онтон олоҕун бүтэһик сылларыгар Харысхал «Победить или умереть» диэн пьесата уус-уран киинэ буолан тахсарыгар дууһатын ууран туран үлэлэспитэ.
Киинэ уһулларыгар хотугу Өлөөн улууһа, баһылык Александр Иванов күүскэ өйөөбүттэрэ. Олохтоох нэһилиэнньэ оҕолуун, кырдьаҕастыын маассабай сыаналарга көхтөөхтүк кыттыбыттара.
Хомойуох иһин, суруйааччы киинэ киэҥ эйгэҕэ тахсар күнүгэр тиийбэтэҕэ – суһаллык олохтон туораабыта. Ол эрэн Өлөөҥҥө киинэ бастакы таҥыытын көрдөрөн, олохтоохтор улахан хайҕабылларыгар, махталларыгар тиксибитэ. Бу киинэ ситэн-хотон, олус интриэһинэй, ураты, сырдык «Белый ангел тундры» диэн киинэ буолан тахсыбыт.
Улуу Ленинград куоратыттан кэлбит кыыс тыйыс айылҕалаах хотугу норуоту кытта доҕордоһуутун, ыарахан ыарыыны кытта охсуһуутун, кини тиийбэтэх суруктарын туһунан Саха сирин бары киинэ тыйаатырдарыгар тохсунньу иккис күнүттэн көрөргүтүгэр ыҥырабыт.