«Балыктаах киэһэтэ» дьон норуот уоһуттан түһэрбэт ырыата быйыл айыллыбыта 50 сыла туолла. Бу туһунан Мэҥэ Хаҥалас култууратын уонна духуобунай сайдыытын управлениетын пресс-сулууспата иһитиннэрэр.
Оччолорго 1970‒1971 сылларга Балыктаахха, кулууп дириэктэринэн билигин СӨ култууратын үтүөлээх үлэһитэ Мария Прокопьевна Скрябина үлэлиирэ. Бу кэмнэргэ, билигин үгэс буолбут улуус тэрээһинэ — Култуура уонна спорт эстафетата саамай маассабай сүрүн тэрээһининэн буолбут кэмэ этэ.
Ол кэмнэргэ саҥаны айар, сибиэһэй идеялаах ыччат дьон түмсэн, биир кэмҥэ, биир бөһүөлэккэ, Балыктаахха үлэлии сылдьан, олохтоох ыччат Павел Габышев хоһоон суруйан, эдэркээн Галина Шахурдина матыып айан бу ырыа биир үтүө күн, уочараттаах Эстафетаҕа бэлэмнэнэн айыллыбыт.
1982 сыллаахха Москваҕа «Останкино» киин телевидениетигэр Хотугу норуоттар бырааһынньыктарын кыттыылаахтарын түмүк кэнсиэригэр «Балыктаах киэһэтэ» ылламмыт. Салгыы норуот таптаан ыллыыр, уоһуттан түһэрбэт ырыата буолбута.
Кэлин эдэр ырыаһыттар Нарияна-Куо, Эльза Павлова ыллаан көрөөччү тапталын, махталын ылбыттара.