Туваҕа ыытыллыбыт буддийскай киинэ бэстибээлигэр саха режиссера Степан Бурнашев киинэтэ «Бастыҥ режиссура» анал ааты ылла.
Оттон Гран-прины «Эдемҥа айан» диэн Киргизия Бакыта Мукула уонна Дастана Жапар уулу режиссердар киинэлэрэ ылла. Бу киинэ ис хоһооно доҕордоһуу уонна бэйэ-бэйэҕэ көмө туһунан драма.
Бастыҥ кылгас усталаах киинэнэн Россия уонна Норвегия холбоһук «Unseen/Невиданное (Көстүбэтэх)» киинэлэрэ ананна. Бастыҥ музыкальнай киэргэтиилээх хартыына наҕараадатыгар «Кызыл дус» тувинскай киинэ тигистэ.
Уопсайа I Норуоттар икки ардыларынааҕы буддийскай киинэ бэстибээлин күрэһигэр үс дойдуттан – Россияттан, Киргизияттан, Норвегияттан 18 үлэ киирдэ. Бэстибээл Тыва өрөспүүбүлүкэтин Камба-Ламба салалтатын көҕүлээһининэн Туваҕа ахсынньы 3-4 күннэригэр ыытылынна.
«Биһиги кыһыммыт» — арахсан эрэр эр уонна ойох сыһыанын көрдөрөр. 10 сыл бииргэ олорбут эрдээх (Илья Яковлев) ойох (Ирина Михайлова) арахсарга быһаарыналлар. Баайдарын тэҥ гына үллэстэн айдаана суох арахсаллар.
Кинилэр бу быһаарыммыт хардыылара – ыарахан да буоллар, ситиспэтэх ыра санааларын толороллоругар саамай табыгастаах быһаарыныы диэн өйдүүллэр. Ол эрээри арахсан баран, кыһалҕаларын төрүөтэ атыҥҥа буоларын өйдүүллэр.