Тохсунньу 16 күнүгэр Саха сирин режиссера Дмитрий Давыдов «Эдэр саас» киинэтин Санкт-Петербург куорат «Аврора» киинэ тыйаатырыгар көрдөрдө.
Хартыына улахан экраҥҥа тохсунньу 19 күнүгэр тахсыаҕа уонна Россия уон куораттарыгар 110 былаһаакканан көстүөҕэ.
«Санкт-Петербургка иккиспин кэллим, онуоха манна киинэ көрдөрө кэлбиппиттэн олус үөрэбин. Биир көрдөһүүм диэн – бу киинэ Саха сирин эрэ туһунан диэн санаамаҥ, биһиги дьон-сэргэ билэр киһитин туһунан дэгиттэр историяны ойуулаатыбыт», — диэн режиссер Дмитрий Давыдов эттэ.
Киинэ национальнай матыыптаах. Онно саха дэриэбинэтиттэн төрүттээх киһи 20 сыл буолан баран төннөрө көстөр. Лиэнтэ сахалыы тылынан, нууччалыы субтитрдаах барар. Режиссер этэринэн, кытаанах климаттаах регион матырыйаалынан кини төрөөбүт дойдутугар кэлэн ыраастаныы ааһар киһини көрдөрө сатаабыт.
Премьераҕа HHG киинэ хампаанньатын салайааччыта кыттыбыт. Киинэ продюсера Владислав Пастернак: «Саха киинэтэ бэйэтин аатын-суолун биллэрэн, киэҥ хабааннаах уонна тутулуга суох буолбута ыраатта». Ону кэнники сылларга элбэх наҕарадааны туппут саха киинэлэрэ туоһулууллар.