Россия наукатын күнүнэн Саха сирин учуонайыгар, техническэй наука докторыгар, академик Владимир Ларионовка анаан өрөспүүбүлүкэ киин куоратын IT-пааркатыгар мурал оҥордулар. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Бу туһунан бэйэтин социальнай ситимигэр СӨ инновациятын миниистирэ Анатолий Семенов иһитиннэрдэ.
«Паарка үрдүкү технологияларын истиэнэтигэр, наука күнүнэн, академик Ларионовка анаан мурал оҥоһулунна. Владимир Петрович мөссүөнүн аттыгар кини туһунан кэпсиир QR-code турда. Эдэр разработчиктар, саҥаны айааччылар уонна инноватордар саха наукатын историятын билиэхтээхтэр», — диэтэ кини.
Владимир Ларионов — өрөспүүбүлүкэ наукатын академиятын, Россия наукатын академиятын Сибиирдээҕи салаатын Саха сиринээҕи наука киинин салайааччыларыттан уонна тэрийээччилэриттэн биирдэстэрэ, 17 монография уонна 300-тэн тахса научнай таһаарыы ааптара.
Өссө 1980-с сылларга Ларионов тэрийбит сыбааркаланар тимир тутуулар үйэлээх буолууларын уонна намыһах температураҕа бөҕө буолууларын фундаментальнай тирэхтэрин оҥорууга оскуолата, хотугу сиргэ матырыйаалынынан туһаныы уонна технология эйгэтигэр бастыҥ научнай оскуола буолар.
Маны таһынан, учуонай чинчийиитин түмүктэрэ Россия улахан массыыналары оҥорор холбоһуктарыгар туһаныллыбыттара.