Киин куоракка Голландияттан 17-с үйэтээҕи сэдэх хартыыналары аҕалыахтара, экспозиция 2021 сыл түмүктэниитэ аһыллыаҕа. Бу туһунан СӨ култуура министиэристибэтин пресс-сулууспата иһитиннэрэр.
«Саха сиринээҕи художественнай түмэл уонна Приморскай судаарыстыбаннай хартыына галереятын өр сыллаах бииргэ үлэлэһиилэрин түмүгэр бу дьикти бырайыак олоххо киирэр буолла. Тэрээһин, Художественнай түмэл филиала — Габышев аатынан Тас дойду искусствотын галереятын сөргүтэн оҥоруу кэнниттэн аһыллыытын чэрчитинэн ыытыллар», — диэн СӨ култуура миниистирин солбуйааччыта Марина Силина кэпсээтэ.
Габышев аатынан Тас дойду искусствотын галереята 2021 сыл түмүктэниитэ, ЯАССР 100 сылыгар анаан аһыллыаҕа.
Национальнай художественнай түмэл иһитиннэриитинэн, арҕааҥы Европа искусствотын быыстапката Голландия XVII-с үйэтин живопиһын бары жанрдарын хабыаҕа: мэтириэт, батальнай уонна бытовой композициялар, натюрморт, пейзаж.
Бу кэм искусствота аан дойдуга бастакы буржуазнай судаарыстыбаны тэрийбит, бэйэтин омугун олоҕун саамай чаҕылхайдык көрдөрөргө дьулуһар худуоһунньуктарынан уратылаах.
Бу сатабыллаах улуу бюргердэр мэтириэттэрэ, салгынынан уонна сырдыгынан сыдьаайар муора пейзажтара, маастарыстыбанан уонна хомуһунунан угуйар бэлиэлээх натюрмортар.
Приморскай судаарыстыбаннай хартыына галереятын хомуйан оҥоруута, көрөөччүгэ оччотооҕу Арҕааҥы Европа XVII-XVIII-с үйэтээҕи буржуазнай Голландия ураты искусствотын туһунан толору өйдөбүлү биэриэҕэ.