Дьокуускай киинигэр Арбитражнай суут тутуллуохтаах сиригэр турбут XIX-XX-с үйэтэҕи дьиэ акылаатын оннун хаһыы кэмигэр араас мал-сал кыырпахтарын уонна былыргы манньыаттары булбуттар. Бу туһунан ТАСС иһитиннэрэр.
«Хаһыы кэмигэр XIX-XX үйэтээҕи дьиэ акылаата көстүбэтэ. Бу дьиэни булуу биир өттүнэн биһиги табыллыыбыт буолар — ол кэм архитектурнай тутууларын конструкцияларын уратыларын быһаарар кыахтаммыппыт, иккис өттүнэн үлэбит уустугуран биэрбитэ. Тоҕо диэтэргин тутуу оннун өр ыраастаан, хостоон таһаарыы ирдэнэр, ол кэнниттэн көтүрүү уонна тиэйии», — диэн Светлана Федосеева аатынан Арктикатааҕы археология түмэлин научнай үлэһитэ Елена Соловьева кэпсээтэ.
Кини этэринэн, чинчийии кэмигэр улахан нумизматическай коллекция түмүллүбүт. Саамай элбэх манньыат ХХ-с үйэҕэ сыһыаннаах эбит.
«Саамай былыргы манньыаттар XVIII-с үйэ саҥатыгар оҥоһуллубуттар. Көстүбүт манньыаттар улахан аҥардара бытархай уонна алтан буолаллар», — диэн эбэн эттэ.
Ону таһынан элбэх ахсааннаах туой оҥоһуктар көстүбүттэр.
«Көстүбүт матырыйаалларынан сыаналаатахха, манна кэлии да, олохтоох да нууччалыы уонна сахалыы туой оҥоһуктар бааллар эбит. Биир сэдэх булумньунан турциялыы тииптээх хамса буолар. Мин билэрбинэн, бу Саха сиригэр көстүбүт бастакы маннык быһыылаах оҥоһук буолар», — диэн Елена Соловьева бэлиэтээтэ.
Миэстэтигэр фарфор уонна фаянс, уҥуох уонна муос, туос, өстүөкэ, тимир, тирии, таҥас мал-сал кыырпахтара, ону тэҥэ эмэгэттэр уонна таҥара быһыылара булуллубуттар. XVII-XX-с үйэтээҥҥи араас мас конструкциялар уонна сүлүүдэ тобохторо көстүбүттэр.
Саамай элбэх мастан оҥоһуллубут мал-сал эбит. Ол иһигэр иһит-хомуос, сахалыы мас халандаар уонна оҕо оонньуур батаһын сорҕото.
«Саамай сэдэх булумньунан XVIII-с үйэтээҕи артиллерийскай пушка таас ядрота буолар. Ядрону булан баран биллэн турар Саха остуруогун историятын интэриэһиргээбиппит. Бу, ХVII-с үйэ ортотугар Дьокуускайга аҕалыллыбыт пушкалар — Россия артиллерията хотугулуу-илиҥҥи Азияҕа тарҕаныытын саҥата эбит», — диэн кэпсээтэ.