Бүгүн, олунньу 14 күнүгэр, киин куоракка, IT-пааркаҕа «Оҕо-аймах сахалыы саҥатын сайыннарыы» диэн стратегическай сессия буолла. Тэрээһин профессор, педагогическай наукалар доктора Феодосия Габышева салайыытынан ааста. Сессияҕа учууталлар, уһуйаан педагогтара, логопедтар, төрөппүттэр уонна Саха тылын сайдыытыгар интэриэстээх дьон кыттыыны ыллылар.
«Биһиги бүгүҥҥү сүрүн сыалбыт – оҕо сайдар стратегиятын оҥоруохтаахпыт. Хайдах бу стратегия олоххо киириэхтээҕий диэн толкуйдуохтаахпыт», – диэн Феодосия Габышева стратсессия сүрүн сыалын туруорда.
Кэпсэтии түһүлгэтигэр «Концепция преподавания якутского языка, литературы и культуры в РС(Я): от замысла к реализации» диэн кинигэҕэ киирбит бырайыактар боппуруостарын дьүүллэстилэр. Бу методическай ыйынньыктаах таһаарыы судаарыстыбаннай былаас уорганнарын исписэлиистэригэр уонна салайааччыларыгар, оскуола, уһуйаан педагогтарыгар уонна дириэктэрдэригэр, наука уонна култуура эйгэтин үлэһиттэригэр аналлаах. Пособие концепцията үлэлиирин курдук бырайыактар үлэлиэхтээхтэр, олоххо киириэхтээхтэр диэн бэлиэтэннэ.
Төрөппүт уонна оҕо алтыһар бириэмэтэ аҕыйаата диэн бэлиэтээтилэр. Төрөппүккэ туһаайыллыбыт этиилэр киирдилэр. Төрөппүт сахалыы саҥарбат буоллаҕына, оҕо хайдах да сахалыы саҥаран киирэн барбат, тылынан иитии төрөппүттэн тутулуктаах. СӨ наукатын академиятын үлэһитэ Юрий Семенов икки тылынан саҥарар оҕолорго чинчийии ыыппытын билиһиннэрдэ, билингв оҕо биир тылынан кэпсэтэр оҕолортон туох уратылааҕын ырыттылар. Ону тэҥэ «Барҕарыы» пуонда үбүлээһининэн «Чохоон» интерактивнай алпаабыт оҥорбутун кыттааччыларга билиһиннэрдилэр.
Стратсессияҕа киин улуустартан уонна куораттан кыттыннылар. Онон кэлэр нэдиэлэҕэ 13 арктическай улууска пуорум ыытабыт диэн Феодосия Габышева бэлиэтээтэ.
Ол курдук, стратсессия икки түһүмэҕинэн ааста. Күн аҥаарыттан кыттааччылар оҕону хайдах сахалыы саҥардабыт диэн бөлөҕүнэн арахсан сайдыы суолун толкуйдаатылар, үлэлэрин түмүгүн көрдөрдүлэр.
Тэрээһини СӨ үөрэҕин уонна наукатын министиэристибэтэ. СӨ наукатын академията, Төрөөбүт тылы чинчийэр, харыстыыр уонна сайыннарар киин көҕүлээн ыыттылар.