Өрөспүүбүлүкэ киин куоратыгар, балаҕан ыйын 22 күнүттэн алтынньы 6 күнүгэр диэри «Кылыадьы Уус нэһилиэстибэтэ» быыстапка Хомус түмэлигэр ыытыллыаҕа. Бу туһунан СӨ Култууратын министиэристибэтэ иһитиннэрэр.
Быыстапка, ЯАССР култууратын үтүөлээх үлэһитигэр, Иван Захаров — Кылыадьы Уус 100 сааһыгар ананыаҕа.
«Кылыадьы Уус саха култууратыгар хомус ууһун быһыытынан киирбитэ. Кини сэттис көлүөнэ уус этэ уонна хомуһу уһаарыы оскуолатын тэрийбитэ. Өрөспүүбүлүкэ араас улуустарыттан уопсайа 55 үөрэнээччилээх», — диэн иһитиннэриигэ этиллэр.
Быыстапка, Музейнай уулусса 2-с №-дээх дьиэтигэр тэриллиэҕэ. Манна маастар бэйэтэ оҥорбут хомустарын ааһан, кини үөрэнээччилэрин үлэлэрэ эмиэ туруохтара.