Олунньу 6-11 күннэригэр 202-с дьоҕус оройуоҥҥа «Хотугу сулус» муус пааркаҕа муус уонна хаар оҥоһуктар күөн күрэстэрэ ыытыллар. Манна уопсайа 15 хамаанда кыттар: Саха сириттэн 11 уонна Хабаровскайтан, Москваттан, Тыва уонна Беларуссия өрөспүүбүлүкэтиттэн.
Быйылгы муус оҥоһукка айылҕа харыстабылын, оттон хаар оҥоһуктарга дойдуга бэриниилээх буолуу тиэмэтин арыйыахтара.
«Муус оҥоһуктарга арыйар тиэмэбит «Саха Сирин тыыннаах айылҕата» (манна «Кыһыл кинигэҕэ» киирбит кыылларбыт, Ытык сирдэрбит барыта хабыллар), онтон хаарга — «Дойдуга бэриниилээх буолуу (патриотизм) тиэмэтэ буолла», -диэтэ тэрийээччи Петр Слепцов.
Түмүк олунньу 11 күнүгэр биллиэ. Кыайыылаахтар муус уонна хаар оҥоһуктар хайысхаларынан уу харчынан наҕараадаланыахтара. Ол курдук, муус оҥоһукка бастаабыттар 150 тыһыынча солкуобайынан, иккис миэстэҕэ тиксибиттэр — 100, үһүстэр – 70. Оттон хаар оҥоһукка бастаабыттар 90 тыһыынча солкуобайы тутуохтара, иккис – 70, үһүс – 50.
Маны таһынан үс биһирэбил бирииһи олохтообуттар, итиэннэ Михаил Максимов аатынан анал бирииһи туттарыахтара.