Сарсын, кулун тутар 20 күнүгэр, киин куоракка, «Сосновый бор» сынньанар уонна доруобуйаны чэбдигирдэр лааҕырга VI-с өрөспүүбүлүкэтээҕи хотугу норуоттар күрэхтэһиилэрэ «Арктика оҕолорун оонньуулара» саҕаланыаҕа. Курэхтэһии кыттыылаахтара — Арктика оройуонун оҕолоро.
«Быйыл «Арктика оҕолорун оонньуулара» күрэххэ сэттэ Арктика оройуонуттан оҕолор сборнай хамаандалара кыттыыны ылыахтара. Бырагыраамаҕа наарта нөҥүө ыстаныы, ноори, оҕууру таба быраҕыы, эбэҥкилэр футболлара, кэтит хайыһарынан куоталаһыы, ону тэҥэ «Хабылык» уонна «Хаамыска» остуол оонньуулара киирдилэр. Көрөргүт курдук, күрэх көрүҥнэрэ хотугу аҕыйах ахсааннаах норуоттар үгэстэрин кытта ыкса сибээстээхтэр», – диэн СӨ бырабыыталыстыбатын бэрэссэдээтэлин солбуйааччы Ольга Балабкина эттэ.
Төрүт оонньуулар былыр-былыргыттан Арктика уонна Хотугу норуоттар үгэстэрин, култуураларын көрдөрөллөр. Ол курдук, булт-алт, балыктааһын, табаны иитээһин манна киирсэллэр, көстөллөр.
Кулун тутар 20 күнүгэр — арыллыы, кулун тутар 21-22 күннэригэр – күрэхтэһии, кулун тутар 22 күнүгэр — түмүк, кыайыылаахтары биллэриэхтэрэ.
Үгэс быһыытынан ыытыллар оонньуулары 2012 сылга Өлөөн орто оскуолата ыытыахха диэн этии киллэрбитэ. I-кы «Арктика оҕолорун оонньуулара» 2014 сыл кулун тутарыгар VI Саха сирин хотугу аҕыйах ахсааннаах норуоттарын сийиэһин, Арктика сылын уонна «Арктика күнүн анныгар» бырааһынньык чэрчитинэн ыытыллыбыта.
Быйыл «Сосновый бор» лааҕырга «Арктика оҕолоро» профильнай смена арыллыбыта. Манна 120 оҕо кытынна. Бу смена оҕолору хотугу аҕыйах ахсааннаах норуоттар култуураларыгар интэриэстэрин тардар гына тэрилиннэ.