MUUS uSTAR бэстибээл чэрчитинэн кулун тутар 21-24 күннэригэр «Эдэр учуонай» треккэ «Наука туһунан судургутук» үөрэхтээһин кластерыгар кулун тутар 21-24 күннэригэр Science Slame куонкурус түөрт бөлөҕүнэн ыытыллыаҕа.
Science Slam эбэтэр научнай слэм — чинчийиини кылгастык научнай-популярнай көрүҥүнэн быһаарыы күрэҕэ. Куонкурус усулуобуйатынан кыттааччылар чинчийиилэрин туһунан 2-3 мүнүүтэ иһигэр кэпсиэхтээхтэр.
Куонкурус модератора Михаил Черосов кэпсээбитинэн, кыайыылаахтар уонна призердар харчынан наҕараадаланыахтара.
«Наукаҕа ыччат трегэ бастакытын ыытыллар. Онон кыттыан баҕалаахтары барыларын ыҥырабыт. Кэлэр сылларга араас куонкурустар түмүктэринэн бастыҥнары талан сааскы тэрээһиҥҥэ ыҥырыахпыт», — диэтэ Михаил Черосов.
Санатан эттэххэ, MUUS uSTAR бэстибээл кулун тутар 25-26 күннэригэр бары эпидемиологическай ирдэбиллэри тутуһан ыытыллыаҕа. Тэрээһин бары былаһааккаларын социальнай ситимнэргэ уонна телевидениеҕэ онлайн көрүөххэ сөп буолуо.
Үөрүүлээх тэрээһини Антон Комолов уонна Михаил Башкатов ыытыахтара. Кинилэри кытта Саха сириттэн эмиэ ыытааччылары талыахтара. Бэстибээл хедлайнердарынан хореограф Егор Дружинин уонна «Союзмультфильм» дириэктэрэ Борис Машковец буолаллар.
Быйыл бэстибээл бырагырааматыгар 13 трек үлэлиэҕэ, ол чэрчитинэн араас куонкурустар ыытыллыахтара, Россия биллэр-көстөр ыытааччыларын, музыканнарын, үҥкүүһүттэрин уонна digital-индустрия үлэһиттэрин кытта көрсүһүүлэр уонна маастар-кылаастар тэриллиэхтэрэ. Сиһилии бэстибээл туһунан иһитиннэриини muusustar.ru сайтка киирэн билсиэххэ сөп.