Киһиэхэ олох биирдэ бэриллэрин курдук доруобуйабыт эмиэ олоххо биирдэ бэриллэр.
Хас биирдии киһи бу күн сиригэр доруобай буолан төрүүр. Салгыы кэлэр олоххор хайдах туруктаах буоларыҥ тус бэйэҕиттэн эрэ тутулуктаах.
Судаарыстыбаннай былаас биир сүрүн соруга — нэһилиэнньэ доруобуйатын харыстааһына буолар.
Нэһилиэнньэ чөл-чэгиэн олоххо тардыһыыта улаатар, физическэй култууранан, спордунан утумнаахтык дьарыктаныыта тэтимин ылан иһэр.
Физкультура уонна спорт киһи этин-хаанын сайыннарар, өйүн-санаатын чэбдигирдэр, үлэлиир дьоҕуру иҥэрэр.
Бу салааҕа салалта өттүттэн улахан болҕомто ууруллар. Ол курдук, өрөспүүбүлүкэ улуустарыгар саҥаттан-саҥа спорт эбийиэктэрэ тутуллаллар, араас таһымнаах күрэхтэһиилэр, тэрээһиннэр тиһигин быспакка тэриллэллэр.
РФ бэрэсидьиэнэ Владимир Путин ыйааҕынан сөргүтүллүбүт «Үлэҕэ уонна оборонаҕа бэлэммин» диэн бүтүн Россиятааҕы физкультурнай, спортивнай хамсааһыны ыытарга кэнники биэс сылга өрөспүүбүлүкэ түөрт муниципальнай оройуона уон уонна икки уокуруга спортивнай уонна технологическэй тэрилинэн хааччыллыбыта.
Саха сиригэр физкультурнай хамсааһын тэриллибитэ 💯 сыла 2023 сылга бэлиэтэннэ. Онно аналлаах элбэх тэрээһин буолан ааста.