Сэтинньи 4-7 күннэригэр буолбут, сыллата ыытыллар «Хомус дьыктааныгар» быйыл Россия 21 куоратыттан 1,4 тыһыынча кэриҥэ киһи суруйда. Бу туһунан Хомус түмэлин пресс-сулууспата иһитиннэрэр.
Дьыктааны Саха сирин, Мордовия, Тыва, Адыгея, Татарстан, Москва уонна Московскай уобалас, Санкт-Петербург, Красноярскай кыраайдар, Новгородскай уобалас, Крым, Брянскай уобаластар, Забайкальскай кыраай, Башкортостан, Челябинскай, Ростовскай уобаластар, Хабаровскай кыраай, Пензенскай, Ярославскай, Псковскай уобаластар, ону тэҥэ Украина уонна Белоруссия дьоно-сэргэтэ суруйда.
«Кыттааччы уопсай ахсааныттан 59 киһи үрдүк баалы ылбыта хомус туһунан билии нэһилиэнньэҕэ киэҥник тарҕаммытын көрдөрөр. Тиэкискэ уустук боппуруостар бааллара. Ол үрдүнэн, элбэх кыттааччы орто таһымтан үрдүктүк суруйбут», — диэн иһитиннэриигэ этиллэр.
«Хомус дьыктаана» аахсыйа — аан дойду норуоттарын варганнарын билиһиннэрэр уонна музыкальнай үнүстүрүмүөн туһунан уопсай билии таһымын бэрэбиэркэлиир, сырдатар бырайыак. 2021 сылга дьыктаан Виртуоз-хомусчуттарга ананна.