Ил Дархан Айсен Николаев Аҕа дойдуну көмүскээччилэр күннэринэн эҕэрдэлээтэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
«Бу бырааһынньык биһиэхэ эр киһи үрдүк аналын – төрөөбүт дойдуга тапталын, көмүскүүргэ бэлэмин, норуотун уонна чугас дьонун туһугар эппиэтинэһин, дойдуга бэриниилээх буолуутун уонна эр санаатын бэлиэтэ буолар. Биһиги Ийэ дойдуларын көмүскээбит дьоммутун умнубаппыт уонна кинилэр сырдык кэриэстэригэр сүгүрүйэбит», — диэтэ кини.
Ил Дархан Аҕа дойду Улуу сэриитин бэтэрээннэригэр, эйэлээх олоҕу уонна куттал суох буолуутун турууласпыт, дьоҕус байыаннай дьайыылар кыттыылаахтарыгар уонна бэтэрээннэригэр, саппааска сылдьар байыаннай сулууспалаахтарга махтанарын биллэрдэ.
«Бүгүн биһиги дойдубутугар эйэлээх олоҕу уонна куттал суох буолуутун турууласпыт дьоммутун эҕэрдэлиибит, ол туһугар олохторун толук уурбут дьоммутун ахтан-санаан ааһабыт. Аҕа дойду Улуу сэриитин бэтэрээннэригэр, дьоҕус байыаннай дьайыылар кыттыылаахтарыгар уонна бэтэрээннэригэр, саппааска сылдьар байыаннай сулууспалаахтарга махталбытын тиэрдэбит. Эһиги баар буолаҥҥыт эйэлээх олоххо олоробут, айар-тутар кыахтаахпыт, олоҕу хамсатар бырайыактары үлэҕэ киллэрэбит», — диэтэ Айсен Николаев.
Ыччат дьон, үүнэр көлүөнэ аҕаларын, эһэлэрин, хос эһэлэрин хорсун быһыыларын өйдүү-саныы сылдьалларыгар, дойду устуоруйатын билэллэригэр, сыаналыылларыгар уонна харыстыылларыгар эрэнэрин биллэрдэ.