Өрөспүүбүлүкэ күнэ уонна Саха АССР төрүттэммитэ 100 сыла, бүгүн, муус устар 27 күнүгэр бэлиэтэнэр.
Бүгүн Саха сирин чулуу судаарыстыбаннай уонна политическай деятеллэрин пааматынньыктарыгар үгэс быһыытынан сибэкки ууруута буолуо. Сарсыардаттан үөрэх тэрилтэлэригэр, түмэллэргэ кинигэ, хаартыска уонна медиа-быыстапкалар үлэлээн барыахтара. Ол курдук, Саха сирин сокровищницатыгар Гохран сыаннастарын, «Россия — мин историям» историческай пааркаҕа «Саха АССР 100 сылынан 100 ааттаммыт алмаас» быыстапкалар үлэлиэхтэрэ. Бу пааркаҕа «Эллэй суолунан. Геокультурнай уобарастар» мультимедийнэй экспозиция арыллыыта буолуо. Национальнай библиотекаҕа 10:00 чаастан «Моя Якутия: незыблемая связь времен, традиций и культуры» кинигэ быыстапката, оттон өрөспүүбүлүкэтээҕи медиакииҥҥэ 11:00 чаастан Саха АССР 100 сылынан почта кэмбиэрдэрин бэлиэтээһин ыытыллыа.
«Лена» киин тыйаатырыгар «За нами будущее…» документальнай киинэни көрдөрүөхтэрэ, оттон 18:00 чаастан опера уонна балет тыйаатырыгар үс түһүмэхтээх «Чурумчуку» балет туруо. Итиэннэ куорат киинэ тыйаатырдарыгар уонна тыйаатырдарыгар «Пламенный Максим» документальнай киинэ көстүө, Софрон Данилов драматынан «От имени народа Саха» спектакль буолуо. 18:00 чааска «Триумф» спорт уораҕайыгар театрализованнай дьүһүйүүнү көрүөххэ сөп.
14:00 чааска Киров аатынан уулуссаттан Комсомольскай болуоссатыгар диэри сэлэлээн хаамыы тэриллиэ. Оттон 15:00 чаастан «Добун Оһуохай», ол кэнниттэн кэнсиэр буолуо.
Киэһээ 21:00 чаастан Комсомольскай болуоссакка фейерверк ыытыллыа.