Горнай улууһугар Дьиикимдэ сынньалаҥ киинигэр «Үҥкүү тааһа» диэн улахан театрализованнай туруорууну көрдөрдүлэр. Бу туһунан «Саха» НКИХ иһитиннэрэр.
Биллэрин курдук билиҥҥи ирдэбилинэн көрөөччүнү саала аҥарыгар мустулар уонна QR-кодтаах дьону киллэрдилэр.
Тэрээһин ыалдьыттарыгар «Үҥкүү тааһа» диэн театрализованнай туруорууну көрдөрдүлэр. Испэктээҕи Эбээн Бытантайтан төрүттээх, Мытаах сынньалаҥ киинин уус-уран салайааччыта уонна хореографа Изабелла Максимова туруорда.
«Эбээн норуотун олоҕун-дьаһаҕын билиһиннэрэр быыстапка, театрализованнай туруоруу үгүс дьон болҕомтотун тарта. Ыалдьыттары эбээн норуотун төрүт аһынан чубуку этинэн, дьарҕаа балыгынан, таба быарынан көрүстүбүт. Эбээн Бытантай култууратын киинин методиһа Рада Малышева кэлэн ыалдьыттаата. Испэктээк оформлениета, оонньооччулар кэтэр таҥастара дьиҥ тигиилээх, оруоллары чахчы ис сүрэхтэн толордулар», — диэтэ Изабелла Максимова.
Быыстапканы Эбээн Бытантай култууратын киинин методиһа Рада Малышева сиһилии кэпсээтэ. Кэлээччилэргэ эбээн норуотун төрүт аһын чубуку этин, дьарҕаа балыгы, таба быарын амсаттылар.