Россия норуоттарын култуурунай нэһилиэстибэлэрин сылыгар уонна Саха АССР төрүттэммитэ 100 сылыгар Нам улууһун Хатырык сэлиэнньэтигэр Максим Аммосов аатынан СӨ судаарыстыбаннаһын историятын музейыгар хапытаалынай өрөмүөн ыытыахтара. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
Ярославскай аатынан музей директора Николай Бугаев иһитиннэрбитинэн, ити сыалга өрөспүүбүлүкэ бырабыыталыстыбата 20 мөлүйүөн солкуобайы ыытыаҕа.
Ону тэҥэ быйыл Чөркөөхтөөҕү политссылка музейы, Ярославскай аатынан музейы, М.К.Аммосов мемориальнай музей-дьиэни саҥардан оҥоруу былааннанар.
«Өрөспүүбүлүкэ музейдара баай историялаах буолаллар. Олохтоохтор музейга сылдьан историяны үөрэтиэхтээхтэр. Оттон биһиги музейдар аныгы ирдэбиллэргэ эппиэттиир туһугар кыһаллыахпыт», — диэн Ил Дархан Айсен Николаев эттэ.