Режиссер Владимир Мункуев үлэтэ «Кинотавр» 32-с киинэ бэстибээлин куонкуруһун бырагырааматыгар киирдэ.
Киинэҕэ, иккис оҕолорун кистээн баран Саха сирин тыйыс айылҕатыгар уонна томороон тымныытыгар тыыннаах хаалаары салгыы туруулаһар Хабдьыйа уонна Кэрэмэс тустарынан кэпсэнэр.
Биирдэ олохтоох кинээс кинилэри кытта сокуон быһыытынан олоруохтаах Костя диэн нууччаныны аҕалар. Уопсай тылы булуу хара маҥнайгыттан табыллыбат, бу киһи бэйэтэ дьиэ хаһаайына буоларга сананар.
Сүрүн куонкуруска уопсайа 15 киинэ ааста. Быйыл бэстибээл Сочи куоракка балаҕан ыйын 18-тан 25 күнүгэр диэри буолуоҕа.