2022 сылга Үөһээ Бүлүү улууһугар ыытыллар Олоҥхо Ыһыаҕар «Олоҥхо сиригэр ЮНЕСКО шедеврдэрин көрсүһүүтэ» норуоттар икки ардыларынааҕы бэстибээл ыытыллыаҕа. Бу туһунан СӨ култуураҕа министиэристибэтин пресс-сулууспата иһитиннэрэр.
«Бэстибээл көмөтүнэн ураты холбоһуктаах туруоруулар баар буолбуттара. Ол курдук, Олоҥхо тыйаатыра куньцюй оператын «Пионовая беседка» пьесатынан испэктээкил туруорбута, оттон Куньцюй оператын хотугу тыйаатыра Былатыан Ойуунускай «Туйаарыма Куо» олоҥхотугар олоҕурбут пьесаны көрдөрбүтэ. Бэстибээл чэрчитинэн култуура эгэлгэтин харыстааһын боппуруостарыгар ананар норуоттар икки ардыларынааҕы научнай симпозиумнар ыытыллааччылар», – диэн СӨ култуураҕа миниистирин бастакы солбуйааччыта Владислав Левочкин Ил Дархан салайыытынан үлэлиир ЮНЕСКО дьыалаларынан хамыыһыйа мунньаҕын кэмигэр иһитиннэрдэ.
Сотору кэминэн бэстибээл ыалдьыттарын ыҥырыы кэпсэтиилэрэ саҕаланаллара этиллэр.
Бэстибээл чэрчитинэн араас маастар кылаастар, аһаҕас былаһааккаларга маассабай көрдөрүүлэр ыытыллыахтара, ол иһигэр Дьокуускайга эмиэ.