Олоҥхо тыйаатыра VI-с регионнар икки ардыларынааҕы «Ново-Сибирский транзит» бэстибээл-куонкурус финалыгар «Три светила» диэн испиктээкили көрдөрдө. Бу туһунан тыйаатыр пресс-сулуупата иһитиннэрэр.
Экспертэр бөлөхтөрө бэстибээлгэ көрдөрүүгэ саха классиктара — Өксөкүлээх Өлөксөй, Алампа, Былатыан Ойуунускай айамньыларынан, Роман Дорофеев туруоруутугар «Три светила» диэн испэктээкили талбыт. Тыйаатыр 14 киһиттэн турар бөлөҕө Россиятааҕы тыйаатыр деятеллэрин сойууһун айан ороскуотун толуйууга гранын сүүйбүт.
«Новосибирскайга кэлэн бэстибээл тэрийээччилэрин — «Кыһыл факел» тыйаатыр бөлөҕүн сылаас көрсүүлэригэр түбэстибит уонна куйаас сайыҥҥа үктэннибит. Бастакы күн икки испэктээкилгэ сырыттыбыт, араас куораттар кыттааччыларын кытта билсистибит. Бэстибээлгэ биир идэлээхтэрбитин кытта алтыһабыт, Саха сирин, тыйаатыр айар үлэтин туһунан элбэҕи кэпсиибит», – диэн бөлөх салайааччыта Саргылана Винокурова кэпсээтэ.
Бэстибээл Новосибирскай куоракка ыам ыйын 19-27 күннэригэр ыытылынна. Тэрээһин чэрчитинэн Россия 15 тыйаатыра 16 испэктээкили көрдөрдө, ол түмүгүнэн дьүүллүүр сүбэ 16 хайысханан лауреаттары быһаарда.
.