Саха сирин олохтоохторун олунньу 13 күнүгэр сахалыы дьыктааны суруйарга ыҥыраллар. Бу туһунан өрөспүүбүлүкэтээҕи национальнай библиотека пресс-сулууспата иһитиннэрэр.
Уустук эпидемиологическай балаһыанньанан сибээстээн дьыктааны үгэс буолбут быһыынан аҕыйах киһи суруйуоҕа (миэстэ туолбут).
Кыттыыны ылыан баҕалаахтар онлайн суруйуохтарын сөп. Саха сирин национальнай библиотеката олунньу 13 күнүгэр күнүс 14.00 чаастан дьыктаан ааҕыллыытын быһа эфиргэ көрдөрүөҕэ.
«Хас биирдии баҕалаах киһи дьыктааны дьиэтиттэн суруйуон уонна сахалыы таба суруйуутун бэрэбиэркэлиэн сөп. Эрдэттэн кумааҕыта уонна ручката бэлэмнээҥ, быһа эфиргэ холбонуҥ», — диэн этиллэр.
Быһа эфир национальнай библиотека YouTube ханаалыгар көстүөҕэ. Биир нэдиэлэнэн дьыктаан тиэкиһэ библиотека сайтыгар таһаарыллыаҕа. Кытааччылар бэйэлэрин бэрэбиэркэлэниэхтэрин сөп.