Алтынньы 17 күнүгэр Суорун Омоллоон аатынан Саха Өрөспүүбүлүкэтин Опера уонна балет тыйаатыра саҥа 53-с сезонун үөрүүлээх быһыыга-майгыга саҕалаата.
Бэлиэ тэрээһиҥҥэ СӨ вице-премьерэ Сергей Местников кыттыыны ылла, артыыстары тыйаатыр сезона саҕаламмытынан эҕэрдэлээтэ.
«Биһиги өрөспүүбүлүкэбитигэр Опера уонна балет тыйаатырын ситиһиитэ тыйаатыр искусствота үрдүк таһымҥа сайдыытын көрдөрөр. Кинилэринэн киэн туттабыт. Тыйаатыр өрөпүүбүлүкэ улуустарыгар олус көхтөөхтүк гастроллуурун бэлиэтии көрөбүн», – диэн Местников эттэ.
СӨ вице-премьерэ бэлиэтээбитинэн, Саха сирин култуурунай уонна духуобунай киинэ тыйаатыр буолар. Манна өрөспүүбүлүкэ олохтоохторун болҕомтотун тардар уопсастыбаннай тэрээһиннэр ыытыллаллар.
Быйыл тыйаатырга РФ бэрэсидьиэнэ Владимир Путин көҕүлээбит «Култуура» национальнай бырайыак чэрчитинэн өрөмүөн ыытыллыбыта. 36 мөлүйүөн солкуобайга сүрүн уонна производственнай корпустары саҥартылар. Оттон 12 мөлүйүөнтэн тахса солкуобайынан тыйаатыр саҥа оборудованиенан хааччылынна.