Биэс сыл анараа өттүгэр Гавриил Ксенофонтов үлэтин харыстыыр уонна сырдатар бөлөх тэриллибит. Бу кэм устата СӨ национальнай библиотеката кини үлэлэрин пуондатын электроннай көрүҥҥэ көһөрбүт.
«Биһиэхэ Гавриил Ксенофонтов илиинэн суруллубут үлэлэр пуондатын бүтүннүү электроннай көрүҥҥэ көһөрөргө көҥүл биэрбиттэрэ. Бүгүҥҥү туругунан, библиотека тоҕус тому бүтүннүү компьютерга көһөрдө, оттон бу сылга библиография чааһын бэлэмнииргэ үлэ барыаҕа. Мин санаабар, уон том үбүлээһинин үчүгэйдик былааннаатахха, үс сыл устата бүтэрэн таһаарыахха сөп», — диэн СӨ национальнай библиотекатын дириэктэрэ Саргылана Максимова эттэ.
Уопсастыбаннай-политическэй диэйэтэл, саха интеллигенциятын бэрэстэбиитэлэ, учуонай, юрист Гавриил Ксенофонтов төрөөбүтэ 135 сылыгар аналлаах «Гавриил Ксенофонтов: инникини куоһарбыт учуонай» диэн төгүрүк остуол тэриллибит.
Төгүрүк остуолу СӨ култуураҕа уонна духуобунай сайдыыга миниистирин бастакы солбуйааччыта Афанасий Ноев тэрийбит. Кини бэлиэтээбитинэн, Саха сирин бастакы бэрэсидьиэнэ Михаил Ефимович Николаев 1993 сылга таһаарбыт ыйааҕынан, Гавриил Ксенофонтов аатынан үгүс тэрээһин ыытыллыбыт.