Дьокуускай куорат киин библиотекатын ситимин «Библиотека волонтера» үлэтэ «Култуура волонтердара — идеялары олоххо киллэрии территорията» бастыҥ көҕүлээһиннэр куонкурустарыгар кыайда. Бу туһунан тэрилтэ пресс-сулууспата иһитиннэрэр.
«Библиотека волонтера» бырайыак «Оҕо библиотекатын үлэтигэр добровольческай практика» хайысхаҕа көрдөрүлүннэ. Бырайыак иитинэн 2019 сылтан баҕалаахтары электроннай кинигэлэри, гаджеттары туһанарга, экологическай уонна финансовай сатабылларга үөрэтэллэр.
Сэтинньи 25 күнүгэр Москваҕа Россия уопсастыбаннай балаататыгар «Култуура волонтердара — идеялары олоххо киллэрии. Култуура волонтердарыттан креативнай экономикаҕа» бүтүн Россиятааҕы форум кэмигэр кыайыылаахтары наҕараадалаатылар.
2020 сылга киин библиотека ситимин бырайыагар аан дойду араас дойдуларыттан онлайн-волонтердар кыттыһан араас хабааннаах маастар-кылаастары, вебинардары уонна көрсүһүүлэри ыыппыттара бэлиэтэнэр.