Саха сириттэн кылгас кээмэйдээх «Река» уонна «Айтал» диэн киинэлэр норуоттар икки ардыларынааҕы BAIQONYR куонкурус биэс хайысхатыгар кыайдылар. Куонкуруска уопсайа 16 киинэ кыттыбыт.
«Река» киинэни режиссер Дмитрий Давыдов устубут, куонкуруска Гран-прины уонна «Бастыҥ режиссура» номинацияҕа кыайбыт. Бастыҥ эр киһи оруолун толоруутун иһин анал ааты Радислав Захаров ылбыт. «Айтал» киинэ бастыҥ сценарий уонна оператор үлэтин иһин наҕараадаламмыт. Оператор — Алексей Павлов, сценарист — Михаил Башкиров.
«Мин саха киинэтин туһугар олус үөрэбин. Продюсер Сардаана Саввиналыын билсэбин. Кыра үпкэ олус үчүгэй, хаачыстыбалаах киинэни оҥороллорун хайгыыбын. Россияҕа саха киинэтэ бастыҥнар ахсааннарыгар киирэр, ураты суоллаах-иистээх, ураты тыыннаах», — диэтэ дьүүллүүр сүбэ бэрэссэдээтэлэ Адильхан Ержанов.