Максим уонна Евгения Арбугаевтар «Выход» диэн киинэлэрэ Оскар бириэмийэтигэр кыттыан сөп, шорт-илиискэ киирбит. «Бастыҥ кылгас киинэ» анал аакка киирсиэҕэ. Хартыынаҕа дьонтон-сэргэттэн тэйбит, учуонай Максим Чакилев үлэтин туһунан кэпсэнэр. Сыл ахсын кини Чукоткаҕа моржтар сытар сирдэрин чинчийэр.
Интэриэһинэйэ диэн, бу кинилэр бастакы киинэлэрэ. Бииргэ төрөөбүт Арбугаевтар Тикситтэн төрүттээхтэр. Евгенияҕа «Выход» киинэ дебютнай үлэ буолбут.
Оскарга америкатааҕы киинэ искуустубатын академията уопсайа 10 көрүҥ анал аакка кыттааччылары талбыт. Наҕарааданы эһиил кулун тутар 12 күнүгэр туттарыахтара. Номинаннары тохсунньу 24 күнүгэр биллэриэхтэрэ.