Владивосток куоракка балаҕан ыйын 2-4 күннэригэр, Илиҥҥи экономическай форум (ВЭФ) чэрчитинэн, саха киинэтин күннэрэ буолуохтара. Бу туһунан быһа эпиир кэмигэр СӨ култуура уонна духуобунай сайдыы миниистирин бастакы солбуйааччыта Владислав Левочкин иһитиннэрдэ.
СӨ култуура министиэристибэтин пресс-сулууспата тиэрдэринэн, саха киинэтин күннэрэ Илиҥҥи экономическай форум култуурунай бырагырааматын чэрчитинэн ыытыллыахтара. Министиэристибэ бэлиэтииринэн, бырагыраамаҕа киирбит киинэни барытын босхо көрдөрүөхтэрэ.
Ол курдук, режиссер Никита Аржаков XVI-XVII үйэлэр кирбиилэригэр саха норуотун олоҕун-дьаһаҕын көрдөрөр «Тыгын Дархан» историческай киинэтин, режиссер Роман Дорофеев «Тиэтэйбит», Алексей Амбросьев «Агент Мамбо» комедияларын көрдөрүөхтэрэ.
Ону тэҥэ, быйыл тахсыбыт киинэлэри көрөөччү дьүүлүгэр таһаарыахтара. Маҥнайгы таптал туһунан «Миигин кытта үҥкүүлээ» Никандр Федоров киинэтэ кэпсиэҕэ. Дмитрий Кольцов «Рядовой Чээрин» байыаннай драмата көстүөҕэ.
Илиҥҥи экономическай форум Владивосток куоракка балаҕан ыйын 2-4 күннэригэр араас көрүҥүнэн ыытыллыаҕа, ыҥырыылаах ыалдьыттар очно уонна онлайн кыттыахтара. Форум тэрээһинэ барыта ВЭФ сайтыгар быһа эпииргэ көстүөҕэ.
Быйыл Сеулга, Шанхайга уонна Токиоҕа үлэлиир форум туспа устуудьуйаларын тэрийэр былаан баар. 2021 сылга быыстапканы ыытыыга ураты болҕомто эпидемияны утары дьаһалларга ууруллуоҕа.