Саха сириттэн сылдьар этно-толорооччу Аэлита Ершова ахсынньы 13 күнүгэр «Россия» ханаалга «Күөх чыычаах» оҕо талаанын куонкуруһугар кыттыаҕа. Бу туһунан ВГТРК пресс-сулууспата иһитиннэрэр.
15 саастаах саха кыыһа биллиилээх битбоксер Вахтангы кытта дуэтынан хомуска оонньуоҕа.
Аэлита СӨ култууратын туйгуна Марина Ильинична Сокольникова-Мохначевская салайыытынан сэттэ сааһыттан хомуска уһуйуллан Саха политехническэй лиссиэй «Добун» норуодунай этнофольклорнай ансаамбылын солиһа. Кини Аан дойдутааҕы, Бүтүн Россиятааҕы, өрөспүүбүлүкэтээҕи фестиваллар уонна куонкурустар кыайыылаахтара. Ону таһынан «Айархаан» хомус академиятыгар Саха сирин үтүөлээх артыыһа, виртуоз хомусчут Альбина Михайловна Дегтяреваҕа эбии дьарыктанар.
«Күөх чыычаах» кэлэр таһаарыытыгар финалга тахсыы уонна биир мөлүйүөн солкуобайдаах сүрүн бириис иһин Россия бары муннугуттан кэлбит артыыстар күрэхтэһиэхтэрэ. Куонкурус дьүүллүүр сүбэтигэр Сергей Безруков, Николай Цискаридзе, Дима Билан уонна Денис Мацуев киирэллэр.
Биэрии ахсынньы 13 күнүгэр киэһэ 18.15 чаастан «Россия» ханаалга көстүөҕэ.