Саха, юкагир, эбээн, эбэҥки, долган уонна чукча норуоттарын билиҥҥи олохторун укулаатын арыйар «Артика дьахтар куоластаах» диэн документальнай бырайыак оҥоһуллуоҕа. Манна норуоттан биирдии кэрэ аҥары талан, алта новелланы устуохтара. Новелла дьоруойдара бары араас олохтоохтор-дьаһахтаахтар, араас көрүүлээхтэр — Дьокуускайга олорор ситиһиилээх менеджер, уһук хоту сир учуутала, урбаанньыт уо.д.а. Кыргыттары видео-куонкурус түмүгүнэн талаллар. Эбэҥки норуотун бэрэстэбиитэлин талбыттар. Бу сайын кастинг салҕаныаҕа.
Бырайыак салайааччыларыттан биирдэстэрэ, «Саха» НКИХ толорооччу продюсера Дарья Ермолаева кэпсииринэн, новеллалары хотугу норуоттар култуураларын үөрэтэр кииҥҥэ — Санкт-Петербург куоракка уонна аҕыйах ахсааннаах норуоттар үгэстэрин, тылларын өйүүр, сайыннарар сиргэ, Дьокуускайга, устуохтара.
Бу — «Саха» национальнай көрөдөрөр-иһитиннэрэр хампаанньа, «Увидеть море» айар студия, «Культурология саҥа института» научнай чинчийэр институт кыттыгас бырайыактара.