«Саамай ааҕар регион» Бүтүн россиятааҕы куонкурус түмүгүнэн өрөспүүбүлүкэ «Кинигэ уонна ааҕыы эйгэтэ» анал ааты ылла. Бу туһунан СӨ култуура министиэристибэтин пресс-сулууспата аиһитиннэрэр.
Эрдэ кыайыылааҕынан ааттана сылдьыбыт уонна биэс сыл иһигэр үс төгүл бастыҥнар испииһэктэригэр киирбит регион ылар. Саха сирэ Россияҕа анал ааты ылбыт үһүс өрөспүүбүлүкэ буолар.
«Бу олус үчүгэй сонун. Национальнай библиотека уонна өрөспүүбүлүкэ библиотекаларын үлэһиттэрин сыралаах үлэлэрин түмүгэ. Кыайыыгытынан итиитик-истиҥник эҕэрдэлиибин. Бу ааты ылбыппыт сөптөөх суолунан салайтаран иһэрбитин туоһулуур», — диэтэ СӨ култуура уонна духуобунай сайдыы миниистирэ Юрий Куприянов.
Куонкурус тэрийээччитинэн Россияҕа цифровой сайдыы, сибээс уонна маассабай коммуникация министиэристибэтин өйөбүлүнэн үлэлиир россиятааҕы кинигэ сойууһа буолар. Россияҕа бастаан Литература сылыгар анаан 2015 сыллаахха тэриллибитэ. Онно кыайыылааҕынан Ульяновскай уобалас ааттаммыта.
2016 сыллаахха «Литературный флагман России» ааты Воронежскай уобалас ылбыта, 2017-ҕэ Санкт-Петрбург, 2018 сыллаахха — Иркутскай уобалас, 2019-ка — Белгородскай уобалас, оттон 2020 сыллаахха саамай ааҕар регионунан Саха сирэ ааттаммыта.
2021 сылга литературнай флагман аатын Архангелскай уобаласка иҥэрбиттэрэ.