Өрөспүүбүлүкэ, Москва куоракка ыытыллар «Зодчество-2021» норуоттар икки ардыларынааҕы архитектура бэстибээлигэр кыттар. Бу туһунан Россия киин куоратыгар Саха сирин бэрэстэбиитэлистибэтин пресс-сулууспата иһитиннэрэр.
«Саха сирин баһылыгын иһинэн үлэлиир архитектура уонна куорат тутуутун управлениета, сири-уоту сайыннарыыга бастыҥ бырайыактарын көрдөрүөҕэ; олоххо киирбит, тутулла турар уонна тутуллуохтаах социальнай эбийиэктэри; тупсаран оҥоруу уонна тупсаҕай эйгэни тэрийии эбийиэктэрин», — диэн иһитиннэриигэ этиллэр.
Быыстапкаҕа култуура, доруобуйа харыстабылын эйгэтигэр өрөспүүбүлүкэҕэ үлэҕэ киирбит уонна былааннанар бырайыактар, искусство Арктикатааҕы киинин курдук сэдэх эбийиэктэрэ, үөрэҕирии тутуулара, ол иһигэр Хаҥалас улууһун Өктөм сэлиэнньэтин оскуола-уһуйаана бааллар.
Ону тэҥэ, куорат тутуутугар аныгы ирдэбилинэн оҥоһуллубут маннык тутуулар кирдилэр — үс Арктика сэлиэнньэтин уонна Дьокуускайга «Звезднай» кыбаартал маастар-былааннара, туристическай эбийиэктэр. Быыстапка биир бэлиэ тутуутунан Өлүөнэ өрүһү туоруур муоста буолуоҕа.
Тэрээһин чэрчитинэн, Россия куораттарын архитектордарын сүрүн Сүбэтин уонна муниципальнай тэриллиилэр мунньахтара ыытыллыаҕа. Саха сирин сүрүн архитектора Ирина Алексеева уонна Дьокуускай сүрүн архитектора Семен Сергеев кыттыыны ылыахтара.