Россия бэрэсидьиэнэ Владимир Путин көҕүлээһининэн «Үөрэхтээһин» национальнай бырайыак чэрчитинэн, Аксения уонна Наталья Посельскаялар ааттарын сүгэр Дьокуускайдааҕы балет оскуолатын баазатыгар оҕо театра үлэлээтэ. Бу туһунан СӨ Үөрэҕин уонна наукатын министиэристибэтин пресс-сулууспата иһитиннэрэр.
Бу Наука аччыгый академиятын иһинэн дьоҕурдаах оҕолору булар уонна өйүүр регионнааҕы киин «Искусство» хайысхата үлэтин саҕалааһына буолла.
Үөрүүлээх тэрээһиҥҥэ СӨ Бырабыыталыстыбатын бэрэссэдээтэлин солбуйааччы Сергей Местников кытынна.
«Саха сирин бары нэһилиэнньэлээх пууннарыгар талааннаах оҕолорго өйөбүл ирдэнэр. Бу талааны кэскилгэ туһаайан, өйүүр олус үгүс суолталаах. Ол сыалтан региональнай киин уонна талааннаах оҕолору булуу уонна өйөөһүн тэрилиннэ», — диэтэ кини.
Тэрилтэҕэ 120 миэстэлээх сцена уонна көрөөччү саалата тэрилиннэ. Манна оҕо уонна ыччат аудиториятыгар аналлаах испиктээги, сыанкалары уонна кэнсиэр бырагыраамаларын куорат олохтоохторугар уонна ыалдьыттарыгар көрдөрүөхтэрэ.