Сэтинньи 27-28 күннэригэр Москваҕа национальностар дьиэлэригэр ыытыллыбыт «Этно-Эрато 2021» Евразиятааҕы үрдүкү муода куонкуруһугар Саха сирин айар түмсүүтэ кыайыыны ситистэ.
Бу туһунан «Саха» НКИХ иһитиннэрэр.
Модельердар бары биэс номинацияҕа күрэхтэстилэр. Россия 20 уобалаһыттан уонна өрөспүүбүлүкэтиттэн 200-тэн тахса ааттаах-суоллаах маастар-модельердар кыттыыны ыллылар. Кинилэр бэйлэрэ оҥорбут көстүүмнэрин көрдөрдүлэр.
Азияна Харлампьева салайар «Возрождение» айар түмсүүтэ «Зов предков» коллекциятынан «Ретро этнического костюма» диэн анал аакка кыайда.
«Бу коллекция биир күнүнэн буолбакка, сыл устата оҥоһуллубута. Бу коллекцияны 13 маастар тиктэ. Хас биирдии көстүүм матырыйаала, оһуора, тигиитин тиэхньикэ ураты. Биһиги үлэбитин сыаналаан, «Ретро этнического костюма» номинацияҕа 1 миэстэни ылбыппытыттан олус үөрдүбүт», — диэтэ айар түмсүү салайааччыта.
Ол курдук, маастардар Дьокуускайтан, Миирнэйтэн, Хаҥаластан, Бүлүүттэн Азияна Харлампьева, Елена Большакова, Матрена Ильина, Майкуо Ноговицына, Валентина Попова, Иван Ефремов, Тамара Жиркова, Светлана Петрова, Федосия Григорьева, Сусанна Семенова, Мария Егорова, Марфа Заборовская, Лидия Иванова, Александра Ефремова кытыннылар.