Өрөспүүбүлүкэ хамаандата Владивосток куоракка ыытыллыбыт бүтүн Россиятааҕы брейкинг үҥкүүтүн «Океан» бэстибээлигэр үрүҥ көмүс мэтээли ылла.
«Бэстибээл брейкинг улахан турнирдарын бары быраабылаларынан ыытыллынна. Аһаҕас бэстибээлгэ Уһук Илин, Пермскэй кыраай уонна хотугу регион спортменнара кыттыыны ыллылар. Баттл олус кэрэхсэбиллээхтик ааста. Биһиги Сахабыт сирин брейкердэрэ таһаарыылаахтык кытыннылар, маладьыастар!», — диэн бэстибээл ыҥырыылаах судьуйата Иван Степанов иһитиннэрэр.
Саха сирин саамай уопуттаах кыттыылаахтарын этиилэринэн, өрөспүүбүлүкэ таһымын кыра-кыралаан тупсарарга дьулуһар. Ол курдук, олунньуга ыытыллыбыт күрэхтэһиигэ регион талыллыбыт хамаандата төрдүс миэстэни ылбыт эбит буоллаҕына, бу сыл өрөспүүбүлүкэбит үҥкүүһүттэрэ үрүҥ көмүс мэтээли ыллылар.
«Хабаровскайга ыытыллыбыт Уһук Илин бүтэһик чемпионатын кытары тэҥнээтэххэ, «Океан» бэстибээл бүтүн Россиятааҕы географията киэҥ.Үөрэнээччилэр бастакы баттлара буолар, өссө да уопутуран иһиэхтэрэ, барыта иннибитигэр», — спортсмен Ньургун Сорокоумов эттэ.