Саха сириттэн сылдьар Мария Саввина Москва куоракка ыытыллыбыт Mercedes-Benz Fashion Week муода нэдиэлэтигэр «Оҕо» бренд саҥа коллекциятын көрдөрдө.
Саҥа сезон көрдөрүүтүн «Манеж» киин быыстапка саалатыттан дойдуга олоҕурбут балаһыанньанан, онлайн-быһа көрдөрөр тус былаһааккаларга көһөрдүлэр. Тэрээһини аан дойду 56 сириттэн тыһыынчаттан тахса сурунаал сырдатар. Саха дизайнера эмиэ аан дойду үрдүнэн социальнай ситим нөҥүө быһа таһаарыыга көһүннэ.
«Саҥа коллекциябар цифровой үйэҕэ киһи ассимиляциятын, төрдүн-ууһун умнуутун чинчийэн көрдүм. Кини историята суох киһиэхэ кубулуйар. Коллекциям нөҥүө төрүт үгэс аныгы кэми кытта дьүөрэлэһэр кыахтааҕын, сайда турарын көрдөрдүм», — диэтэ Мария Саввина.
Мария Саввина тулалыыр эйгэ киртийиитин хотугу дойду уонна ретро-футуризм кэрэ көстүүтүн нөҥүө көрдөрөр.
«Mercedes-Benz Fashion Week тэрээһиҥҥэ үһүс төгүлүн сырыттым. Мин санаабар, коллекция хас сыл аайы дьону сөхтөрөр. Саха төрүт култууратын элеменнэрэ сырдык дьүһүннээх минималистическай уобараһынан доҕуһуолланарын олус сөбүлээтим», — диэтэ фэшн-дизайнер Светлана Ховрова.
«Оҕо» маарка туттуу, туһаныы култууратын хаттаан көрөргө ыҥырар. «Саһарҕа» коллекцияҕа винтажнай матырыйааллар уонна урукку коллекцияттан ордубут таҥастар, кыра да оҥорон таһаарыыттан элбэх сыыс тахсарын көрдөрөр сыаллаах, туттулуннулар.
«Саҥа коллекциябар апсайклинг техниканы туһанным. Эргэ ыскаатартан, көбүөртэн саҥаны оҥорон таһаардым. Манан эргэрбит маллары туһаҕа ыытан аҕыйах бөҕү таһаарыахха, билиҥҥи кэмҥэ тулалыыр эйгэ туһунан толкуйдаан туттуохха диэн көрдөрдүм», — диэтэ Мария Саввина.
Бастакы виртуальнай муода Нэдиэлэтэ Москва, Санкт-Петербург, Сочи, Краснодар, Джакарт уонна Саха сирин дизайнердарын түмтэ. Россияттан эрэ буолбакка, бэйэлэрин коллекцияларын Аргентина, Великобритания, Перу уонна АХШ муоданы айааччылара көрдөрдүлэр.