Владивосток куоракка ыытыллыбыт k-pop кавердар куонкурустарыгар киин куорат «Digit project» үҥкүүһүттэр хамаандалара иккис миэстэ буолары ситистэ.
Кинилэр Stray Kids бөлөх Thunderous ырыатынан үҥкүү туруордулар. Кубогынан уонна 100 000 тыһыынча солкуобай суумалаах сертификатынан наҕараадаланнылар.
«Куонкуруһу Соҕуруу Корея күннэригэр аналлаах бэстибээл чэрчитинэн ыыттылар. Уопсайа 73 хамаанда кытынна. Түмүктүүр түһүмэххэ араас куораттартан 15 хамаанда ааста. Ону тэҥэ, биһигини кытта DPROJ үөрэнээччилэрбит бөлөхтөрө кытынна», — диэн хамаанда кыттааччыта Виктория Емельянова кэпсээтэ.
«Digit project» үҥкүү оскуолата 2014 сыллаахха тэриллибитэ. Үөрэнээччилэрэ араас куонкурустарга кытталлар. Виктория Емельянова кэпсииринэн, оскуолаҕа 50-ча киһи дьарыктанар.