От ыйын 6-16 күннэригэр Черноморскай оройуон Межводнай бөһүөлэгэр «Джангуль» аан дойдутааҕы тыйаатырдар уонна көрдөрүүлэр инклюзивнэй бэстибээллэрэ буолла. Бу бэстибээлгэ Саха сириттэн куһаҕаннык истэр оҕолор ситиһиилээхтик кыттан кэллилэр.
«Северные звездочки» фольклор инклюзивнэй ансаамбыла I истиэпэннээх лауреат, «Тигинэт» ансаамбыл «Бастыҥтан бастыҥ» анал аат хаһаайына буоллулар.
««Шаг в мир звуков» кохлеарнай импланнаах оҕолору чөлүрүгэр түһэрэр өрөспүүбүлүкэтээҕи уопсастыбаннай тэрилтэ «Музыка детских сердец» бырайыагын уонна Бэрэсэдьиэн граннарын пуондатын көмөтүнэн куһаҕаннык истэр оҕолор «Джангуль» бэстибээл-куонкуруска ситиһиилээхтик кыттан кэллилэр. Бэстибээлгэ Саха сириттэн үс ансаамбыл кытынна: «Дружба», «Тигинэт», «Северные звездочки» фольклор инклюзивнэй ансаамбыллара. Манна куорат уонна өрөспүүбүлүкэ оҕолоро дьарыктаналлар», — диэтэ салайааччы Николай Баттахов.
Саха сиригэр куһаҕаннык истэр 460 оҕо баар. Сыллата, быһа холоон, 10-ча оҕо мөлтөхтүк истэрэ быһаарыллар. «Шаг в мир звуков» уопсастыбаннай тэрилтэ, искусство уонна култуура көмөтүнэн «Музыка детских сердец» бырайыага оҕолор чөлгө түһэллэригэр туһуланар.
Мөлтөхтүк көрөр уонна истэр оҕолор өрөспүүбүлүкэтээҕи оскуолаларыгар үлэлээбит Клавдия уонна Герман Хатылаевтары утумнаан, Николай Айталина Батаховтар оҕолору фольклорга уһуйаллар. Бүтүн өрөспүүбүлүкэттэн оҕолору түмэн, фольклор араас көрүҥэр дьарыктыыллар.
«Манна күүс-көмө буолбут дьоммутугар «Ситим» ансаамбыл салайааччытыгар Надежда Поповаҕа, импланнаах оҕолору түмэн үлэлиир Юлия Устиноваҕа, Оксана Николаеваҕа махталбытын биллэрэбит», — диэтэ кини.