Евгений Кульков «Пятница» ханаал, «Кондитер» кулинарнай шоу төрдүс сезонугар бастыҥ кулинар аат ылар иһин кытта сылдьар. Бу туһунан «Якутия 24» ханаал иһитиннэрэр.
Евгений олунньу ыйга Москваҕа квалификация үрдэтинэ
сылдьан сүүмэрдээһини ааста.
«Мин улахан уопут ыллым, Аан дойду таһымнаах Ренат Агзамовы кытта билистим. Ыарахан буолуо дии санаабатаҕым. Куонкурус, бастатан туран шоу. Табыгаһа суох усулуобуйаҕа, холобур, иккилии илиис, билииккэ, түөрт киһиэхэ миксер уонна хааччахтаммыт ахсааннаах бородуукта көрүллэр. Ол эрэн барыта этэҥҥэ ааста, куонкурус кэмнээҕи турукпун билигин да өйдөөн хаалбыппын. Хамаанда олус үчүгэй этэ, үс кыыс уонна мин. Билигин да кыттааччылары кытта билсэбит, бэйэ-бэйэбитигэр сүбэ-ама бэрсэбит», — диэтэ эдэр кулинар.
Евгений Дьокуускай куоракка олорор уонна сакааска торт оҥорор. Кини үлэтин түөрт сыл анараа өттүгэр бэйэтэ кэмпиэт оҥорон саҕалаабыт.
«Бэйэ оҥоһуу кэмпиэт ролигын сөбүлүү көрбүтүм уонна
хатылыырга санаммытым. Сүрдээх үчүгэйдик табыллан барбытыгар, салгыы
сайыннарарга быһаарыммытым. Ол кэмҥэ чугас доҕорум өйөөбүтэ, торт оҥорон
саҕалыырбар санаатын эппитэ. Онтон туорт оҥорон барбытым», — диэн кэпсээтэ
Евгений.
Эдэр киһи бэйэтин дизайнер, худуоһунньук быһыытынан холонон көрбүт. Салгыы туорт астыырынан дьарыгыран барбыт. Дьон иэйиитин, олоҕун устуоруйатын торт нөҥүө олоххо киллэрэр.
«Сорох кондитердар оҥоһуктарын искуустуба айымньытынан ааттыахха сөп — мин онно дьулуһабын. Холобур, Tortik Annushka — Аан дойдуга биллэр Москва ыччата, Vogue сурунаалга бэчээттэннилэр, Токиоҕа торт музейын арыйдылар. Эбэтэр ураты көстүүлээх десертэри оҥорор, Украинаттан төрүттээх Динара Касько», — диэтэ Евгений.