Сэтинньи 25 күнүгэр Саха сиригэр Олоҥхо күнэ бэлиэтэнэр. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
«15 сыл анараа өттүгэр ЮНЕСКО саха Олоҥхотун аан дойду норуоттарын тылынан уус уран баайынан билиммитэ. Олоҥхо – биһиэхэ өбүгэ саҕаттан бэриллибит олох энциклопедията уонна духуобунай баайа буолар. Олоҥхоҕо саха норуотут өркөн өйө, философията, хатыламмат уратыта тиһиллэ сылдьар», — диэн Ил Дархан Айсен Николаев эҕэрдэ суругар этиллэр.
Саха норуотун героическай эпоhын аан дойду култууратын ураты пааматынньыгынан билинии Олоҥхону аар саарга аатырдыыга төһүү күүс буолла. Маны тэҥэ аныгы эйгэҕэ эпическэй нэһилиэстибэни кэнэҕэски көлүөнэҕэ чөл тиэрдиигэ уонна сайыннарыыга биһиэхэ улахан эппиэтинэһи сүктэрдэ.
Өрөспүүбүлүкэ салалтата Олоҥхону, салгыы сайыннарыыга, үөрэтиигэ, аан дойдуга тарҕатыыга уонна айымньылаах көҕүлээһиннэри өйөөһүҥҥэ ураты болҕомто уурар. Бу үгүс өрүттээх үлэ биир сүрүн хайысхатынан Олоҥхо Ыһыаҕын тэрийии итиэннэ сыллата сэтинньигэ Олоҥхо күнүн бэлиэтээhин иитинэн анал декаданы тэрийии буолар.