Ил Дархан Айсен Николаев Саха сирин олохтоохторун Хомус күнүнэн, ону тэҥэ Хомус аан дойдутааҕы түмэлэ уонна киинэ тэриллибитэ 30 сылынан эҕэрдэлиир. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
«Хомус – дьырылаан-дьурулаан, этигэнин киллэрэн кэпсээн бардаҕына, сүрэҕи-быары долгутар, өйү-санааны өрүкүтэр, үрдүккэ кынаттыыр, ааспыты аныгыны кытта ситимниир дьикти эйгэни үөскэтэр саха омук төрүт култууратын ураты инструмена буолар. Сахабыт сиригэр анаан-минээн хомус алыптаах дорҕоонун истээри аан дойду араас муннуктарыттан кэлэллэр», — диэн кини эттэ.
Дьокуускайга Хомус аан дойдутааҕы түмэлин уонна киинин тэрийии саха хомуһун устуоруйатыгар биир ураты суолталаах түгэнэ буоларын бэлиэтээтэ.
«Бу тэрилтэ бэриниилээх, сыралаах үлэтинэн бүгүн Сахабыт сирэ аан дойдуга хомус музыкатын сайыннарыы киининэн аатырыаҕын аатырар. Ханнык да дойдутааҕар хомусчуппут ахсаана элбэх. Хомуһу тардарга оскуола иннинээҕи үөрэх тэрилтэлэригэр, оскуолаларга үөрэтэллэр, хомус үөрэҕэ орто анал үөрэх кыһаларын программатыгар киирэр», — диэн Ил Дархан тоһоҕолоото.
Ааспыт 30 сыл устата Хомус аан дойдутааҕы түмэлэ уонна киинэ өрөспүүбүлүкэбитигэр хомуһу үөрэтиигэ, чөл хаалларыыга уонна сайыннарыыга, хомус тас дойдуларга дьон-сэргэ биһирэбилин ыларыгар киэҥ үлэни ыытта. #АйсенНиколаев #Праздник #Якутия