Өрөспүүбүлүкэтээҕи «Сулустар» ырыа куонкуруһун сүүмэрдиир түһүмэҕэр 15 кыттааччы киирэн анал үөрэҕи ааһа сылдьар. Кинилэри Юрий Платонов аатынан эстрада судаарыстыбаннай тыйаатырын биэс биллэр-көстөр артыыһа ырыа маастарыстыбатыгар уһуйар. Хас биирдии салайааччыга үстүү ырыаһыт сыһыарылынна. Сүрүн болҕомтону сөпкө ыллыыр сатабылы сайыннарыыга уураллар.
Бөдөҥ бырайыакка Саха сирин араас муннугуттан 92 кыттааччы инстаграмҥа ырыатын устан ыыппыта. Кинилэртэн 15 бастыҥы сүүмэрдээбиттэр. Манна 18-тарыттан 35-тэригэр диэри саастаах ыччат муһунна. Кинилэри дьүүллүүр хамыыһыйа уларыйа сылдьан сыаналыаҕа.
«Сулустар» ырыа күрэҕэ «Муус устар» диэн ыччат бэстибээлин иитинэн ыытыллар.