Иннокентий Тарбаховы саха амтаннаах аһын аан дойдуга киэҥник тарҕаппыт талааннах асчытынан билэбит.
Дойду үрдүнэн биллэриллибит уһуйааччы сылынан уонна өрөспүүбүлүкэбитигэр үлэ сылынан Таатта Ытык Күөлүгэр ас-үөл эйгэтигэр бэйэлэрин суолларын булбут асчыттар, Иннокентий Тарбахов үөрэнээччилэрэ маастар кылаас биэрдилэр. Ол курдук, «Тыгын Дархан» ресторан шеф-повара Константин Матаннанов чыыр балыгы астаата. «Сэттис халлаан» ресторан шеф-повара Иван Решетников хатарбаны кытта убаһа этин буһарда. Оттон Иннокентий Тарбахов сиэнэ, «Муус Хайа» ресторан шеф-повара Семен Тарбахов убаһа этиттэн тар-тар оҥордо.
Тэрээһиҥҥэ эдэриттэн эмэнигэр тиийэ барыта 83 киһи кыттыыны ылла. Олохтоохтор ааттаах-суоллаах асчыттартан элбэҕи ыйыталастылар, сүбэ-ама ыллылар уонна уһуййаччыыларын утумнаан дьоҥҥо-сэргэҕэ билиилэрин-көрүүлэрин үллэстибиттэригэр махталларын тиэртилэр.