Табаны иитиигэ норуоттар икки ардыларынааҕы чемпионат түмүктүүр күнүгэр кыттааччылар Нерюнгритааҕы «Арктика» оскуолатыгар ыалдьыттаатылар. Манна өрөспүүбүлүкэбит биэс аҕыйах ахсаннаах норуотун оҕолоро үөрэнэллэр: эбээннэр, эбэҥкилэр, чукчалар, дьүкээгирдэр, долганнар.
Үөрэнээччилэр оскуолаҕа экскурсия ыыттылар. Түмүккэ кэнсиэр көрдөрдүлэр. Манна «Дэвэлчэн» тыйаатыр студията, «Лэредо» ансаамбыл, «Одяри» муода студията, 10 кылаас үөрэнээччилэрэ кыттыыны ыллылар, ону тэҥэ Карина Сибирякова эбээн тылынан саҥа ырыатын сүрэхтээтэ.
Ленин болуссатыгар оскуола үөрэнээччилэрэ биэс хотугу норуот үҥкүүтүн толордулар: дэвэйдэ, госигор, мачорай, лондол, хэдьо, хэйро уонна да атын үҥкүүлэр.
Күн эргииринэн үҥкүү сомоҕолоһуу уонна доҕордоһуу бэлиэтэ буолар, чемпионат кыттааччылара оҕолору тэҥҥэ ыллаатылар-үҥкүүлээтилэр!