Сэтинньи саҕаланыыта саха режиссера уһулбут «Тыгын Дархан» киинэтэ Россия 150 киинэ тыйаатырыгар көстүөҕэ. Бу туһунан СӨ Култуураҕа уонна духуобунай сайдыыга министиэристибэтин пресс- сулууспата иһитиннэрэр.
Киинэ Крымҥа, Уралга, Сибииргэ, Башкортостаҥҥа, Мурманскай, Архангельскай, Саратовскай уобаластарга, Уһук Илиҥҥэ, Кавказка, Карелияҕа уонна дойду киин, соҕуруу регионнара, ону тэҥэ Москваҕа көстүөҕэ. Киинэ проката Сомоҕолоһуу күнүгэр, Саха АССР төрүттэммитэ 100 сылыгар уонна Саха сирэ Россия састаабыгар киирбитэ 390 сылыгар анаммыт.
Чэппиэргэ, алтынньы 28 күнүгэр, Москваҕа кинематографистар киин дьиэлэригэр «Тыгын Дархан» киинэ сүрэхтэниитэ буолбута. Хартыынаны сырдатыыга режиссер-постановщик Никита Аржаков, продюсер Вера Филиппова, сценарист Владимир Кузьмин, сүрүн оруолу толорбут Ньургун Бэчигэн, композитор Константин Шевелев, көстүүм худуоһунньуга Дария Дмитриева, ону тэҥэ СӨ Култуураҕа уонна духуобунай сайдыыга миниистирин солбуйааччы Марина Силина кытыннылар.
«Өрөспүүбүкэ олохтоохторун көмөтүнэн норуот киинэтэ оҥоһулунна. Манна кыратыттан кырдьаҕаһыгар диэри бары кытыннылар. Ыаллар кыра оҕолоох кэлэннэр, уһуллар былаһааккаттан барыахтарын баҕарбаттар этилэр. Биһиги кыһынын -61 кыраадыска Үөһээ Дьааҥыга, сайынын +39 кыраадыска киинэни устубуппут», – диэн продюсер кэпсээтэ.
Киинэҕэ көстөр хартыыналары оҥорорго XVI үйэтээҕи уонча ураһа, мал-сал, сүүһүнэн сэрии сэбэ-сэбиргэлэ, үс тыһыынча кэриҥэ национальнай көстүүмнэр оҥоһуллубуттара. Уопсай сыаналары устарга уонтан тахса тыһыынча киһи кыттыбыт.
«Тыгын Дархан» киинэ Василий Семенович Яковлев-Далан романын матыыбынан уһуллубута.
2022 сылга саха киинэтин Индияҕа, Кытайга, АХШ-га, Великобританияҕа, Канадаҕа, Соҕуруу Кореяҕа көрдөрөр былаан турар.