Саха өрөспүүбүлүкэтин судаарыстыбанныһын күнүгэр, быйыл ойуур баһаара турбут улуустарыттан Тюмень куорат “Тараскуль” санаторийыгар эмтэнэ тиийбит дьон, оһуохай түһүлгэтин тэрийэн ыыттылар.
«Саха сирин быйылгы баһаардарыгар эмсэҕэлээбит нэһилиэктэриттэн, уопсайа 12 улуустан 179 киһи, Россия 12 улахан реабилитационнай кииннэриттэн биирдэстэригэр, Тюмень куорат аттыгар турар Тараскуль санаторийга эмтэнэллэр. Судаарыстыбаннас күнүгэр, Саха сириттэн сынньанааччылар, оһуохай түһүлгэтин тэрийдилэр. Тэрээһин саҕаланыытыгар Россия, Саха сирин гимнэрэ тыаһаатылар. Кэбээйи улууһуттан эмтэнэ тиийбит делегация салайааччыта, Тыайа оскуолатын дириэктэрэ Аргунова Азалия Петровна, Саха сирин судаарыстыбаннаһын историятыттан билиһиннэрдэ», — диэн Анна Сивцева кэпсээтэ.
Сынньанааччылар улахан хордара, Ангелина Файрушина тылыгар уонна мелодиятыгар «Сахам сирэ» ырыаны байаан доҕуһуолунан толордо. Ол кэннэ үс киһи ситимнээн оһуохай эттилэр, ыраах Арҕаа Сибиир “Тараскуль” санаторийга араас омук дьонугар, саха норуотун култууратын билиһиннэрдилэр.